近年興起手沖咖啡，主要器材以Chemex手沖壺或Hario V60手沖杯為主，加埋濾紙同細嘴細沖壺(好似阿拉丁嗰d)。Hario其實係一間日本超耐熱玻璃公司, 以虹吸(syphron)咖啡壺起家, 07年先開始出V60手沖杯。Chemex同虹吸都係德國人發明, 所以你可以想像沖咖啡過程就好似做實驗咁，手沖咖啡好講究咖啡粉同水的比例, 仲有水温, 沖時分兩次各一半注水, 然後要打圈咁注水。上網睇手沖咖啡過程, 簡直同茶道有得揮, 沖之前仲要預熱個杯…至於虹吸仲誇張, 不過有咖啡發燒友話試過虹吸咖啡既香醇就返唔到轉頭喎, 之前睇新聞話旺角家樂坊間Starbucks有虹吸咖啡玩, 我下次返黎都要去試下。
講到底, 我覺得飲咖啡係重意不重形。我記得當年讀書時去巴黎, 連咩係Espresso都唔知, 喺香榭麗舍大道見到Café個menu求其點左杯最平既, 然後一遞俾我我突左一突: “唔係掛咁細杯!” 然後加糖加奶入口, 味道真係一試難忘, 嗰一杯到而家仲係我覺得人生飲過最好味既咖啡。我諗飲咖啡，咖啡豆靚唔靚佔左六成, 然後三成係環境同心情, 剩番一成先係你點沖。
如果大家有甚麼問題和分享，請隨時找我啊 facebook.com/dishtravel
聯絡我們：[email protected]
【英國Travel ‘n’ Cook-36】#coffee #手沖咖啡 #syphron #V60 #chemex